Ginekologia

Kontrazepzioa, haurduntza, menopausia… Emakumearen bizitzako funtsezko etapa horietan, espezialista bat da solaskide nagusia: ginekologoa. Berak eskatutako probek lagundurik, arazo ginekologikoak artatzen ditu, eta, gainera, garrantzizko eginkizuna betetzen du prebentzioan eta diagnostikoan.

Urtean behin gutxienez joan behar da ginekologoarengana; baina, pelbiseko minak, hemorragiak, ezohiko hilekoak badituzu edo bularrean koskor bat baduzu, zoaz berehala harengana. Ginekologoa funtsezkoa da prebentzioari begira. Berak agintzen ditu zitologiak, mamografiak, hezur-dentsitometriak eta abar, adinaren eta osasun-aurrekarien arabera. Nola egiten da bisita?

Ohiko kontsultak 20 eta 30 minutu bitartean irauten du. Tentsioa eta pisua neurtu baino lehen, bular-haztapena eta azterketa ginekologikoa egin behar dira. Azken horri esker, bulbaren, baginaren, umetoki-lepoaren eta obulutegien ezaugarriak behatzen ditu ginekologoak.
Azterketa egiteko, espekulu deritzon metalezko tresna mehe eta luzea sartzen du medikuak pazientearen baginan. Azterketa hori osatzeko, bagina miatzen du: esku-larrua jantzi eta hatz erakuslea tentu handiz sartzen du, barruko organo genitalak ukitzeko. Horrez gain, zitologia egiteko lagina ere har dezake. Miaketa egin behar den gorputz-atalean jantziak kendu behar badira ere, ez da beharrezkoa osorik biluztea.